منتدى الاصدقاء (منتدى طلاب جامعة المنصورة)

منتدى كونة مجموعة من الاصدقاء واهميتة التعارف وتكوين الصداقات وزيادة الترابط بين الاصدقاء.
 
الرئيسيةالبوابةمكتبة الصورالتسجيلدخولشات المنتدى

شاطر | 
 

 أبولمعة في حرب أكتوبر

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
godzela

avatar

عدد الرسائل : 347
العمر : 29
المزاج : مشغول
اسم الكلية : كليه العلوم
تاريخ التسجيل : 26/03/2008

مُساهمةموضوع: أبولمعة في حرب أكتوبر   الأحد 31 أغسطس 2008 - 20:02

يا سلام علي حر الصيف

لا يخليك قادر تطلع علي الكورنيش علشان ماتتبهدلش رطوبة ولا يخليك قادر تقعد في بيتك علشان ماتتقطعش حرارة وعجبي عليه حر عجيب في البلاد اللي بره الحر محترم جدا زي السعودية حر بمعني الكلمة لافيه نيل يجيلك منه رطوبة ولا غيره تاخد الحر من هنا ويجيلك ضربة شمس اما في مصر فالحر مش محترم نفسه لما تتعب وتحتر وتشغل المروحة تقوم تلاقي عندك نزلة برد وطبعا برد الصيف احد من السيف


انا بقي قررت اني انزل اتمشي علي الكورنيش واللي يحصل يحصل بقي وانا بتمشي علي النيل حبيبي لقيت واحد بيتخانق مع بتاع الترمس وبيقوله

يا حرااامي حبة ترمس باتنين جنيه ليه ده شوال الترمس دلوقتي باتنين جنيه

بتاع الترمس رد عليه وقال

يابيه هوه فيه اصلا كيلو ترمس باتنين جنيه علشان يبقي فيه شوال

وكمان بتكدبني طب انا بقي هاتصل بشرطة المسطحات المائية يجوا يشيلوك من هنا ويعملولك مخالفة عربية ترمس من غير حزام

حزام ايه يابيه مايصحش كده

وكمان مش معاك طفاية دول هايروقوك دلوقتي وديني ما انا سايبك الا في القسم

طبعا ده كان ابو لمعة بيتخانق مع بتاع الترمس مالقاش حد اغلب منه يتخانق معاه دخلت اهديه شوية بدل مايفرج علينا الحبيبة اللي علي الكورنيش

يابو لمعة صلي علي النبي خلاص كده الراجل عرف غلطه

يا x_x لازم يتأدب مش سايبه الا في امن الدولة

ليه بس يابو لمعة الراجل عمل ايه علشان امن دولة

لأ عمل كتير بقي الراجل بيبيع ترمس مستورد من اسرائيل مش سايبه الافي مبني المخابرات

طيب يابولمعة بينا بقي من هنا لان الناس بدات تسمع كلامنا وشكلهم هايضربوا الراجل

ماشي يا x_x علشان خاطرك بس

مشينا انا وابو لمعة قدام شوية وقعدنا نتكلم

ايه يابو لمعة خير يصح تمسك الراجل الغلبان ده وتبهدله كده

معلش يا x_x اصلي كنت متعصب شوية ده بيبيع ترمس اسرائيلي ياتامر

يا بو لمعة كبر

لا اكبر ازاي يا x_x ياحبيبي ده انا بطل وما اسكتش علي حاجة زي دي

بطل ازاي يابولمعة

ايه ده يا x_x انت ماتعرفش اني كنت من المحاربين في حرب اكتوب

انهي اكتوبر ده يا بولمعة

اكتوبر 73 يا x_x الله انت ماتعرفش الحرب دي ولا ايه

حرب ايه يابولمعة اللي كنت فيها هوه انت عندك كام سنة اصلا

مش فاكر اصل البطاقة في البيت المهم انا كنت من الابطال

طب فهمني ازاي بس من الابطال

بص يا x_x ياحبيبي

بصيت ياسيدي

انا قبل الحرب كنت مطوق الدبابة بتاعتي جنب القنال وراكنها صف تاني ونايم جنبها شوية

دبابة مطوقها يابولمعة

سيبني اكمل يا x_x ياحبيبي علشان ماتقطعش خيط افكاري

حاضر كمل يابولمعة

المهم كنت نايم جنب الدبابة مستني الدليفري اصلي كنت جعان شوية

دليفري ايه يابولمعة

دليفري كباب كنتاكي يا x_x

طيب كمل يابولمعة

المهم ياتامر الدليفري وصل وجابلي الكباب وقبل مايمشي سالته معاه هدية قالي اه معاه تمثال بطوط بيزمر

بيزمر كمل يابابا

اخدت الدبابة بتاعتي وقولت اطلع بيها شوية اتمشي علي القنال اهوه اشم هوا حلو يا x_x

حلو يابولمعة

فجأة لقيت القائد بتاعنا طالع وبيقولنا يلا ساعت الصفر بدأت ياولاد اهجموا

هاه وبعدين يابولمعة

وبعدين يا x_x حبيبي ركبت الدبابة بتاعتي وجريت علي العدو اول حاجة كان لازم الاول انزل القناة واعديها بدبابتي علشان اوصل علي الشط التاني

طبعا استنيت لغاية المهندسين المصرين لما عملوا الكباري وعديت

لا طبعا يا x_x انا بطل وما اعملش كده والا الوقت يضيع مني

طب عملت ايه يابولمعة

ولا حاجة يا x_x دوست علي زرار في الدبابة حولها لغواصة بسرعة ونزلت بيها القنال

نعم يا بو لمعة ازاي

اصل ياx_xدي دبابة متطورة صناعة هندية يعني شغل علي ماية بيضا

طيب يابولمعة كمل

وانا ياx_x تحت الماية طلعوا عليا غواصتين العدو قلت تعمل ايه يابولمعة قلت مافيش اني اضرب عليهم طوربيدين

وبعدين يابولمعة كمل

ضربت عليهم الطوربيدين ولقيتهم اتنسفوا تماما والماية اللي حواليا بقيت تغلي من الحرارة

ليه يابولمعة يعني

اصلي ضربت عليهم طوربيدين نووي يا x_x

نعم يابولمعة ودبابتك اقصد غواصتك ماحصلهاش حاجة

لا يا x_xاصل دبابتي اللي بقت غواصة مطعمة ضد النووي

اه كمل يابولمعة

المهم ياحبيبي وصلت الشط التاني قمت دوست علي زرار في غواصتي ورجعت تاني دبابة وقومت هاجم علي العدو

وايه اللي حصل بعد كده يابولمعة

طلع قدامي متين ظابط اسرائيلي شايلين قاذفات صواريخ وخمسين دبابة وعشر طيارات هيلكوبتر وسبع مدرعات ده غير الضفادع البشرية اللي مالقوش ماية فحفروا مجري مائي علشان يقدروا يهاجموني

هاه وعملت ايه يابولمعة

قومت علي طول مشغل الميكرفون بتاعي وقولتلهم اللواء القائد الجنرال المشير ابولمعة بيقولكم سلموا نفسيكم احسنلكم

طبعا يابولمعة ماسلموش نفسيهم

بص همه اول ماسمعوا الندا بتاعي لقيت القائد بتاعهم باعتلي مسيدج علي الموبايل بتاعي وبيقولي فيه انت صخيخ ايريدم ابو لمأة قومت بعتله مسيدج وقولتله ايوة انا ابو لمعة الاصلي فجأة لقيت العدو كله بيقول اجروا بسرعة ابو لمعة الاصلي وصل ياجدعان

الاسرائيلين قالوا يابولمعة اجروا يا جدعان

انا هاكدب يعني عليك ياحبيبي المهم لقيت مسيدج تانية وصلتلي انهم خلاص هايسلموا سلاحه

وبعدين يابولمعة

كلهم سلموا سلاحهم الا ظابط واحد مارداش وقال هايحارب

وده كان معاه ايه يابولمعة

كان معاه الابتدائية باين

لا يا بولمعة اقصد كان معاه سلاح ايه

كان معاه مسدس فيه طلقتين بس

طب انت عملت ايه

ماسكشت طبعا ضربته صاروخين ورميت عليه عشر قنابل وحداشر صابع دناميت لغاية ما قالي خلاص انا هاستسلم

نعم يابولمعة

ايوة زي مابقولك والدولة كرمتني وادتلي الدبابة هدية بمفاتيحها وانا شايلها عندي في البيت دلوقتي

شايل ايه يابولمعة

الدبابة

اه الدبابة طيب انت هاتروح فين دلوقتي يابولمعة

هاتمشي شوية

طيب انا هاروح

روحت البيت وفتحت كل المراوح الموجودة وكمان مروحة السقف وفتحت التليفزيون بالمرة لقيت نشرة تسعة والمذيعة واقفة علي الكورنيش بتقول
مجنون يحاصر بائع علي الكورنيش بدبابة مطالبا اياه بتسليم الترمس

_________________
ربنا إننا سمعنا منادياً ينادي للإيمان أن أمنوا بربكم فأمنا ربنا فاغفر لنا ذنوبنا وكفر عنا سيئاتنا وتوفنا مع الأبرار

ربنا وآتنا ماوعدتنا على رسلك .



الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
pinkish*white

avatar

عدد الرسائل : 1182
العمر : 22
المزاج : حسب المزاج
تاريخ التسجيل : 01/07/2008

مُساهمةموضوع: رد: أبولمعة في حرب أكتوبر   الجمعة 5 سبتمبر 2008 - 14:29

ههههههههههههههههههههههههههههههههههههههه






يا ما فى الشوارع مجانين afro affraid

_________________


كان يغنى لى فى نومى..........كان يأتى لى فى حلمى..........ذلك الصوت الذى يغنى وينطق بإسمى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
harry potter

avatar

عدد الرسائل : 2306
العمر : 29
المزاج : magic
اسم الكلية : العلوم
تاريخ التسجيل : 18/04/2008

مُساهمةموضوع: رد: أبولمعة في حرب أكتوبر   الجمعة 5 سبتمبر 2008 - 15:27

هههههههههههههههههههه
بجد عسل
وتامر مين ياعم انا ساكت عليك من الاول
وفكرتنى بعادل امام
قولته اضرب ياله

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
أبولمعة في حرب أكتوبر
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الاصدقاء (منتدى طلاب جامعة المنصورة) :: القسم الترفيهى :: منتدى الترفية والنكت-
انتقل الى: