منتدى الاصدقاء (منتدى طلاب جامعة المنصورة)

منتدى كونة مجموعة من الاصدقاء واهميتة التعارف وتكوين الصداقات وزيادة الترابط بين الاصدقاء.
 
الرئيسيةالبوابةمكتبة الصورالتسجيلدخولشات المنتدى

شاطر | 
 

 غرفة المونتاج الأفلام......... (خلطبيطه)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
pinkish*white



عدد الرسائل : 1182
العمر : 22
المزاج : حسب المزاج
تاريخ التسجيل : 01/07/2008

مُساهمةموضوع: غرفة المونتاج الأفلام......... (خلطبيطه)   الإثنين 25 أغسطس 2008 - 18:08

-
بســم الله الرحمن الرحيم -










- علي فكرة يا جماعة دي مقالة للتريقة علي الافلام الاجنبية المشهورة -

غرفة المونتاجبقلم د/ أحمد خالد توفيق
المختصر المفيد

(المختصر المفيد) هو العنوان الذي اخترته لهذه السيناريوهات المترجمة التي يقدمها موقع إنترنت طريف اسمه (غرفة المونتاج). صاحب الموقع رأى الكثير جداً من الأفلام الأمريكية حتى أصابه الملل، وبدأ يفهم قواعد اللعبة؛ لذا أنشأ هذا الموقع ليلخص فيه كل فيلم باختصار شديد وسخرية لاذعة. يمكن لمن لم يروا الفيلم معرفة فكرته العامة، لكن من رأوه سوف يستمتعون فعلاً بقراءة هذه السيناريوهات. ولسوف نرى إنه عاشق للسينما وعدو لدود لها معاً !. اخترت للترجمة اللهجة العامية لأنها تعبر أكثر عن أسلوب الموقع:

العالم السفلي
Underworld
ظهور تدريجي.
خارجي مدينة معتمة.
الممثلة (كيت بيكنسيل) تقف فوق برج عال وقد بدت قوطية جداً.
كيت بيكنسيل:
أنا مصاصة دماء .. فيه كتير غيري في الحرب الدايرة تحت الأرض .. لما بنحاربش المذءوبين باروح اشتري بلاطي مطر، وأعمل خروم في الشراب بتاعي.
ترى مذءوبين يتبعون (سكوت سبيدمان) فتطاردهم في الأنفاق.
داخلي. النفق.
معركة بالمسدسات تصويرها سيئ جداً.
مصاص دماء:
قطيعة !.. الكاميرا بتتهز وبتتحرك بسرعة لدرجة إني مش فاهم حاجة !
(تصيبه رصاصة زرقاء لامعة)
أي !ّ.. أنا مت .. ادفنيني مع مجموعة قصص (آن رايس) ! (يموت)
تستمر المعركة . هي صاخبة جداً لهذا تبدو جيدة. وكلما حسبتها موشكة على الانتهاء استمرت. في النهاية تنتهي وتعود (كيت) لقيادة مصاصي الدماء.
داخلي. منزل كبير قوطي.
(كيت بيكنسيل) تدخل المنزل مارة بمجموعة من مصاصي الدماء يكتبون الشعر ويتظاهرون بالتوحش. تتجه إلى المسئول عن تسليح مصاصي الدماء لتريه رصاصة.
كيت بيكنسيل:
فيه مصاص دماء مننا اتضرب بدي وقتلته..
المسئول عن تسليح مصاصي الدماء:
(يدرس السلاح) واو !.. ده نور الشمس ضغطوه وعملوا منه رصاصة ..!
قبل أن ينصرف جمهور السينما المغتاظ يدخل (شين برولي).
شين برولي:
أنا قائد مصاصي الدماء .. أنا ابن كلب حقيقي .. بحبك يا (كيت) لكن برضه بكرهك .
كيت بيكنسيل:
متأسفة .. أنا بحب (سكوت سبيدمان) مع إنه بشري ..
ترحل باحثة عنه.
داخلي. شقة (سكوت سبيدمان).
كيت بيكنسيل:
هو المذءوبين كانوا بيطاردوك ليه ؟
سكوت سبيدمان:
المذء.... إيه ؟
كيت بيكنسيل:
إنت وقعت في حرب بقى لها مئات السنين بين المذءوبين ومصاصي الدماء. والمذءوبين دلوقت بيطاردوك عشان ناويين يقوموا على مصاصي الدماء.
سكوت سبيدمان:
يا نهار إسود !
فجأة يدخل (مايكل شين):
أنا مذءوووب ! (يعض سكوت) . وإنت كمان !
تدور معركة سخيفة بالمسدسات. في النهاية تهرب (كيت) و(سكوت).
داخلي. عيادة دكتور منعزلة أو شيء من هذا القبيل.
(كيت) تقيد (سكوت) بالأصفاد إلى مقعد.
كيت بيكنسيل:
أنا آسفة . إنت حتتحول لمذءوب وانا بعمل كده عشان أحميك..
سكوت سبيدمان:
استني .. إنتي بتكتفيني ليه ؟.. كده المذءوبين حيمسكوني بسهولة ..
كيت بيكنسيل:
بص .. كفاية تعذيب للمشاهدين بأه .. الفيلم بقى له ساعة وأنا وانت عمالين نجري يمين وشمال.. كفاية كده ..
سكوت سبيدمان:
بيتهيألي فات الأوان.
(كيت) ترحل.
داخلي. منزل كبير قوطي.
(كيت بيكنسيل) تعيد الحياة لـ (بيل ناي) زعيم مصاصي الدماء. يبدو سخيفاً فعلاً.
بيل ناي:
(كيت).. إنتي إتجازوتي تسلسل الرئاسة في ......
كيت بيكنسيل:
بلاش كلام فارغ .. إنت شفت المؤثرات الخاصة خلت شكلك إزاي ؟.. المفروض المشاهد ياخد المشاهد دي جد ؟
بيل ناي:
أخرجي !.. إنتي مطرودة من البيت !.
(كيت) تعود لعيادة الدكتور.
كيت بيكنسيل:
(سكوت).. أنا لازم أهربك من هنا ..
يقبض على (سكوت) لذا تبحث عنه ثانية. تدور معركة سخيفة بالمسدسات. في النهاية يسقط الجميع في المجاري.
داخلي. المجاري.
(مايكل شين) يحقن (سكوت سبيدمان) بشيء قذر ما.
سكوت سبيدمان:
إيه الي بيحصل هنا ؟... المذءوب حاول يشرح لي لكن ما فهمتش ولا حرف من كلامه ..
مايكل شين:
(شين برولي) قائد مصاصي الدماء خاين وساعدني أوصل ليك .. لو عضك مصاص دماء ومذءوب سوا تتحول لهجين .. كده تنتهي الحرب دي. الحرب دي بدأت لما (بيل ناي) قتل البت بتاعتي .. بنته .. عشان شافها معايا .. هو مش عاوزنا نختلط بمصاصي الدماء ..
تصل (كيت بكنسيل). يقتل (مايكل شين) برصاصة تقتل مصاصي الدماء.
سكوت سبيدمان:
(كيت) .. أنا عرفت الحرب بدأت إزاي .. أنا قريت السيناريو أخيراً !
كيت بيكنسيل:
هو فيه سيناريو ؟... أنا فاكرة بتوع المؤثرات الخاصة هما الي عملوا الفيلم ده ..
فجأة يصل (شين برولي).
شين برولي:
أهلاً يا (سكوت).. أنا خنت مصاصي الدماء عشان أعملك هجين .. ده حصل فعلاً.. ححاول أقتلك دلوقت مع إن ده يناقض كل الي أنا عملته طول الفيلم ..
يحاول.
مايكل شين:
مع إنهم ضربوني برصاصة بتموت المذءوبين، لكن أنا مامتش .. بصراحة مش عارف ليه .. (كيت) .. لو عضيتي (سكوت) حيبقى خليط من المذءوب ومصاص الدماء.. (يموت).
(سكوت) يتحول إلى أسخف كائن ظهر في اسخف فيلم في التاريخ.
بيل ناي:
إنت مقرف !.. أنا حاقتلك !
بتصارعان ويوشك (بيل) على الفوز، حين تلتقط (كيت) سيفاً وتثب لجانب الحجرة الآخر بعيداً تماماً عن (بيل). وحين تنزل نجدها تحمل سيفاً نظيفاً تماماً.
بيل ناي:
أرجو إنك ما تكونيش عملتي إلي خايف إنك تعمليه. (يسقط نصف وجهه). يا دي القرف !.. ليه كل الأفلام بتعمل كده دلوقتي ؟ (يموت).
الآن تنظر (كيت) لسيفها الذي صار ملوثاً بالدماء لا نعرف كيف.
سكوت سبيدمان:
هيييه !.. الحرب حتخلص !.. الحمدلله المذءوبين ومصاصي الدماء بقوا حبايب خلاص !
كيت بيكنسيل:
تعال بقى نشتري بالطو مطر جديد ونسمع موسيقا روك ..

النهاية

_________________


كان يغنى لى فى نومى..........كان يأتى لى فى حلمى..........ذلك الصوت الذى يغنى وينطق بإسمى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
pinkish*white



عدد الرسائل : 1182
العمر : 22
المزاج : حسب المزاج
تاريخ التسجيل : 01/07/2008

مُساهمةموضوع: رد: غرفة المونتاج الأفلام......... (خلطبيطه)   الإثنين 25 أغسطس 2008 - 18:13




قراصنة الكاريبي
Pirates of the Caribbean
ظهور تدريجي.
داخلي. بورت رويال.
(كيرا نايتلي) تجول في المنطقة، وهي فتاة صعبة المنال.
كيرا نايتلي:
بصفتي بنت معاصرة أنا شايفة تقاليد المجتمع ظالمة وبتخدم الرجالة. عشان كده كل شويه حشتكي من الكورسيه الي أنا لابساه.
أورلندو بلوم:
(كيرا)..!..أنا بموت فيها .. بس لو ما كنتش خرع كده ..!
رجل عسكري أبله:
إفهم !.. (كيرا) بتاعتي أنا .. أنا ضابط رتبته عالية لكن غبي.. ولو اتجوزتها حخليها تلبس كورسيه على طول !.. نيا ها ه هاه !
يدخل (جوني ديب).
جوني ديب:
أنا جيت عشان أشيل الفيلم على كتافي. شكلي طول الوقت مسطول كأني شارب حاجة .. شكلي كان كده في فيلم (من الجحيم) و(الضربة) و(الخوف والكره في لاس فيجاس) وأي لقاء تلفزيوني طلعت فيه..
أورلندو بلوم:
أنا بكره القراصنة !
يصل القرصان الشرير (جيفري راش) ويبدأ في قتل الجميع. يخطفون (كيرا) عن طريق الخطأ.
أورلندو بلوم:
عشان الدقة .. انا بكره القراصنة الأشرار. أنا بحبك يا (جوني ديب).. تعال ننقذ (كيرا).
(جوني ديب) يحاول الهرب من (بورت رويال) ويفشل. يحاول ثانية. ينجح !.. (أورلاندو) ومجموعة القراصنة التي لا تناسب الدور تتبع (جيفري راش) إلى جزيرة ما.
داخلي. كهف في الجزيرة.
يقف القراصنة الأشرار بينما يضع (جيفري راش) ميدالية في صندوق.
جيفري راش:
آررر !.. لما نحط شويه من دم (كيرا) ونحط الميدالية دي في الصندوق، مش حنبقى قراصنة أشباح بيتحولوا لهياكل عظمية..ده لو ميزانية المؤثرات الخاصة سمحت بكده !
قرصان:
تمام !.. كده حنرجع نموت زي الناس !.. أي حد يقدر يموتنا !.. هييييه !
المشاهدون:
ياه !.. الأحداث سريعة جداً.. الفيلم شكله حيخلص بعد ستين دقيقة بس .. حطوا بقى خناقة هنا يبقى فيلم قراصنة ممتاز !
المخرج (جور فيربنسكي):
لأ.. لسه ما فيش مشهد كبير.. لازم سفينتين كبار يضربوا مدافعهم على بعض ..
يستمر القراصنة لكن من دون نجاح.
كيرا نايتلي:
ها !.. وضحكت عليكم .. قلت لكم إنكم محتاجين لي لكن في الحقيقة إنتم كنتم محتاجين (أورلاندو بلوم) .. انا أنقذت حياته!
جيفري راش:
أررر !.. لكن إحنا ما أذيناكيش لسه !.. كل الي كنا عاوزينه إننا نشيل اللعنة الي علينا عشان نعرف نموت ..
كيرا نايتلي:
تمام !.. وأنا بوظت لكم ده !
تبدأ استعراضات المؤثرات. مشهد ضخم لسفينتين تتبادلان إطلاق النار. (ديب) و(كيرا) يحبسان على جزيرة يتشاجران فيها كثيراً جداً. في النهاية يقابلان الرجل العسكري الأبله ويعودون للجزيرة الأولى.
داخلي. كهف في الجزيرة.
القراصنة يحاولون لكن (ديب) يقاطعهم ويحذرهم من الهجوم القادم، بينما هو يأخذ ميدالية خاصة به.
يخرج القراصنة ويذبحون عديداً من رجال الجيش معدومي الحيلة الذين لا يستطيعون الدفاع عن أنفسهم.
تدور مبارزة بين (ديب) و(جيفري راش) الذي لا يموت. في النهاية يحاول (أورلاندو) أن يرفع اللعنة. سرعان ما يصير القراصنة قابلين للضرب، ويموت الجميع.
جوني ديب:
بصوا بقى .. ساعات شوية قرصنة تبقى لذيذة. لكن كله إلا قرصنة الإنترنت .

النهاية

_________________


كان يغنى لى فى نومى..........كان يأتى لى فى حلمى..........ذلك الصوت الذى يغنى وينطق بإسمى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
pinkish*white



عدد الرسائل : 1182
العمر : 22
المزاج : حسب المزاج
تاريخ التسجيل : 01/07/2008

مُساهمةموضوع: رد: غرفة المونتاج الأفلام......... (خلطبيطه)   الإثنين 25 أغسطس 2008 - 18:15



الماتريكس أعيد تحميله 2
Matrix Reloaded
ظهور تدريجي.
خارجي. شارع مظلم.
نموذج كمبيوتر لـ (كاري -آن موس) بوجه غير بشري بالمرة تطير من نافذة. تطلق النار على عميل.ثم تموت.
داخلي. سفينة نبوخذ نصر. زرقاء.
(كيانو ريفز) يصحو من كابوسه. يجد (كاري -آن موس) البشرية هذه المرة تنام جواره.
كيانو ريفز:
أووووف !
كاري -آن موس:
إيه ؟.. عملتها على روحك تاني ؟
كيانو ريفز:
الكابوس ده .. إنتي تطيري من شباك بالحركة البطيئة، يقوم عميل يضربك بالرصاص...
كاري -آن موس:
طبيعي ..لأنك شفت إعلان (ماتريكس) خمسين مرة في سنتين ..
كيانو ريفز:
شفتيني لما كنت بحارب كل العملاء (سميثات) دول ؟.. أنا لازم اشوفه تاني .. يهبل !
داخلي. مجرور مظلم.
(لورنس فيشبورن) و(كاري آن موس) و(كيانو ريفز) في (شات مجاري) مع كل الثوار.
جادا بنكت سميث:
الكل يسمع. (أوزيريس) بعتت إرسال. الآلات بتحفر عشان توصل (زيون). مش فاهمه ليه ما فكروش في كده من زمان..
لورنس فيشبورن:
طيب يا جماعة.. أنا متأكد إن العرافة (جلوريا فوستر) حتتصل بينا .. عشان كده عاوز سفينة تقعد هنا .. ده بيخالف أوامر قائدنا العسكري لكن أنا شايف إنه حمار .. طظ فيه
كيانو ريفز:
انا مش حاسس بخوف عشان كده المشاهدين مش حاسين بإن فيه خطر ..
العميل جاكسون:
يا خسارة . مع إن دلوقتي أول خناقة في الفيلم ولازم تقطع نفس الناس ...
يتقاتلان بالكونج فو . ويضرب (كيانو ريفز) العميل (جاكسون) علقة لها العجب. ثم يطير.
داخلي. زيون.
كل السفن تتجه لزيون. لا شيء يحدث. كل شخصية تكلم الشخصية الأخرى مدة ربع ساعة. ينام المشاهدون. هناك مشهد جنسي لا يراه أحد لأن الجميع ناموا.
المشاهدون:
هم بيتخانقوا عشان ينقذوا العالم الهباب ده ؟.. ده يقرف. صحوني لما يرجعوا (الماتريكس).
في النهاية تتصل العرافة (جلوريا فوستر) بـ (كيانو) ويزورونها.
خارجي. حديقة مضاءة جيداً.
يجلس (كيانو) جوار (جلوريا) بعد ما قاتل (سينج نجاي) بلا سبب.
جلوريا فوستر:
إزيك يا (كيانو).. آسفة لأن الحوار بتاعي مش مكتوب حلو زي أول مرة اتقابلنا فيها. أنا برنامج.. كل قراراتك اتاخدت فعلاً..(ترينيتي) حتموت ولازم تلاقي (راندال دك كيم).. لازم تهرب..
كيانو ريفز:
فهمت .. بقولك إيه .. ماشفتيش الواد إلي كان بيتني المعالق في الجزء الأول؟. الحوار زي الزفت وبيتهيألي لو جه دلوقت ممكن يساعدنا ..
جلوريا تهز رأسها وترحل.
العميل سميث (هوجو ويفنج):
مستر (أندرسون) !
كيانو ريفز:
الجملة دي كويسة بس متاخدة من الفيلم الأولاني ..ما عندكش كلمة تانية ؟.
فجأة يظهر عدد من الـ (هوجو ويفنجات) الآخرين. يقاتلون على موسيقا ألعاب فيديو. برغم أن المشهد جيد لكن المؤثرات مفضوحة جداً.
هوجو ويفنج:
ليه بتحارب بالكونج فو ؟.. ما تنط جوانا وتفجرنا زي الفيلم الأولاني ؟.. مش دي موهبة جديدة عندك؟
كيانو ريفز:
القوة الوحيدة الجديدة عندي هي الطيران ..
هوجو ويفنج:
حاجة تقرف ..
كيانو ريفز:
مفيش حاجة تقرف زي منظري وانا بالف بالعصاية دي حوالين نفسي في السما ..
يحارب ويحارب وفي النهاية يقرر الفرار.
داخلي. مطعم مضاء جيداً.
(لورنس فيشبورن) و(كاري آن موس) و(كيانو ريفز) يدخلون المطعم ويتكلمون مع (لامبرت ولسون).
لورنس فيشبورن:
عاوزين (راندال داك كيم).. أنا بتكلم جد .. طول عمري جد ..
لامبرت ولسون:
مش حاسلمه لكم لكن ممكن تاخدوا البت بتاعتي (مونيكا بلوشي).. حتروح من ورايا وتجيبه .. دلوقت بعد إذنكم عشان أدلع نفسي ..
مونيكا بلوشي:
جررر !.. أنا بتجنن لما يخدعني .. عشان أغيظه حاديكم (راندال)..
كيانو ريفز:
استني .. إنتي برنامج برضه .. مش كده ؟.. هو الآلات برمجتك عشان تحسي بالغيرة وتخدعي ؟
يهربون مع (راندال) في سيارة.
لورنس فيشبورن:
بسرعة .. لازم نخرج (راندال) من هنا !
كاري آن موس:
وناخده فين بالضبط ؟
لورنس فيشبورن:
بعيد عن الناس الوحشين .. الهم إحنا منتظرين (نيو) ينقذنا ..
كاري آن موس:
مش واخد بالك إن المشهد ده لو مالوش هدف يبقى ملوش لازمة ؟.. حتى لو متصور حلو ؟
لورنس فيشبورن:
ده فيلم (ماتريكس).. يعني كل حاجة ملهاش لازمة ما عدا الإبهار ...
يطاردهما اثنان من الألبينو يبدو منظرهما كعبدة (هيلاسيلاسي). مزيد من موسيقا الفيديو.
الألبنو الأول:
واضح إن ما لناش لازمة ..
الألبنو الثاني:
فعلاً كده..
في النهاية ينقذ (كيانو) الجميع ويأخذهم إلى وكر سري.
داخلي. قاعة مؤتمرات مظلمة.
(لورنس فيشبورن) و(كاري آن موس) و(كيانو ريفز) وكل الثوار يجتمعون بـ (راندال داك كيم).
راندال داك كيم:
عشان ننقذ عالمنا لازم تهاجموا في نص الليل. عاوز هجوم من تلات مراحل.
لقطات كثيرة من المهمة، بينما يناقش (راندال) والثوار الخطة. فور انتهاء المناقشة تكون المشكلة قد حلت ويدخل (كيانو) غرفة الضوء.
داخلي. غرفة بيضاء مضيئة.
كيانو ريفز:
إنت مين ؟
المفسر:
أنا المفسر ..أنا كتبت سيناريو الماتريكس. ما عرفتش أشرح العقدة الصعبة بتاعته فقرت أقعد هنا في آخر الفيلم، وأسيبك تسأل الأسئلة الصعبة إللى المشهدين عاوزين يسألوها. لازم تسأل أسئلتك الأول وبعدين تخش على أسئلة الجمهور.
كيانو ريفز:
أنا هنا ليه ؟
المفسر:
من كام سنة قبل فيلم (السرعة) ما ينجح إنت بعت روحك للشيطان، مقابل إنك تاخد شهرة أكبر من موهبة تمثيلك إللي زي الزفت. سلسلة ماتريكس هي الشيطان بيحقق وعده.
كيانو ريفز:
مين (أوزيريس) ؟.. ومين الواد في (زيون) إللي عمال يضايقني ده ؟
المفسر:
حتلاقي التفسيرات لو اشتريت (أنيماتريكس).. دي مجموعة لقطات تحريك قصيرة من مخرجي الأنيمي المشاهير..
كيانو ريفز:
وإيه هرش المخ إللي (جلوريا) قالته عن مصاصي الدماء والمذءوبين ؟.. إزاي (جادا بينكت) وصلت لـ (لورانس فيشبورن) في مطاردة العربيات ؟..
المفسر:
حتفهم الكلام ده لو اشتريت لعبة (أدخل الماتريكس) بتاعة وندوز وبلاي ستيشن 2.. فيها ضرب نار ومصارعة تمام ..دي مش مجرد لعبة .. دي جزء من فهم (Matrix Reloaded).. هي دي القصة ورا القصة ..
كيانو ريفز:
كويس .. طيب (هوجو ويفنج) بيقول إنه وأنا بيننا ارتباط معين ؟.. وإزاي باسيطر على الآلات في العالم الحقيقي ؟..هل حكنسب الحرب لو ماخترتش الباب إللي على يميني ؟
المفسر:
حتفهم الإجابة لو شفت (ثورات الماتريكس) إللي حيتعرض سنة 2003..
كيانو ريفز:
أنا بكرهك !.. طب جاوب على ده .. هل حنكتشف في الآخر إن العالم الحقيقي مجرد ماتريكس تاني ؟
المفسر:
يا ربي !.. أرجو ده ما يحصلش ..
كيانو ريفز يرحل ويطير لينقذ (كاري آن موس) من إطلاق الرصاص عليها. لكنها تصاب على كل حال. لكنه يمد يده في الماتريكس ويخرج الرصاصة كأنها مجلة هزلية.
كاري آن موس:
ده شيء مخالف للمنطق ..
كيانو ريفز:
استني أما تشوفي حعمل إيه بره السفينة.
يوقف مجموعة من الحراس الذين يشبهون العقارب، وتتصاعد التترات بينما تعزف موسيقا الفيلم بالكامل.

النهايــــــــــــة

_________________


كان يغنى لى فى نومى..........كان يأتى لى فى حلمى..........ذلك الصوت الذى يغنى وينطق بإسمى
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
غرفة المونتاج الأفلام......... (خلطبيطه)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الاصدقاء (منتدى طلاب جامعة المنصورة) :: القسم الادبى :: الخواطر والنثر والقصص الادبية-
انتقل الى: