منتدى الاصدقاء (منتدى طلاب جامعة المنصورة)

منتدى كونة مجموعة من الاصدقاء واهميتة التعارف وتكوين الصداقات وزيادة الترابط بين الاصدقاء.
 
الرئيسيةالبوابةمكتبة الصورالتسجيلدخولشات المنتدى

شاطر | 
 

 برعي أفندي قرر يتجوز مش تبركوله

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
harry potter

avatar

عدد الرسائل : 2306
العمر : 30
المزاج : magic
اسم الكلية : العلوم
تاريخ التسجيل : 18/04/2008

مُساهمةموضوع: برعي أفندي قرر يتجوز مش تبركوله   الثلاثاء 1 يوليو 2008 - 5:38

تعالو يا حلوين اقلكوا حكاية برعي افندي :

برعي افندي يهم بالنصراف من عمله الحكومي .. ومارس عذابه اليومي في وسائل المواصلات ... وعاد إلى غرفته المتواضعة ... هالك .. هالك . ولم يشعر بشيء ... فقد راح في سبات عميق ... لكن ... الباب يطرق ( بووم بووم ) .
برعي افندي : فيه إيه بس ؟ مييييييييييييين ؟ عم عوكل البواب الجديد ؟ فيك حيل للخبط ده ؟

عم عوكل : ازيك يا برعي افندي ...؟

برعي افندي : بتزعجني ... وبتقلق منامي ... وتطير النوم من عيني عشان تقوللي : ازيك يا برعي افندي ؟

عم عوكل : لأ أنا أزعجتك عشان أقوللك لم عزالك ، وورينا عرض اكتافك ...

برعي افندي : انت في وعيك ولا اتجننت يا عوكل ؟!

عم عوكل : آني أوعى منك ومن اللي يتشدد لك ...

برعي افندي : يا ربي ... أنا بحلم ؟ حتى البواب مش عاملي حساب وبيهزأني ؟

عم عوكل : يا بيه ما تأزمش نفسك ... لأن الكلام اللي قلته مش عن لساني ... ده كلام صاحب البيت بالحرف ....

برعي افندي : و... و و صاحب البيت بيقول كدة ليه ؟ هي دي آخرة العشرة ؟

عم عوكل : لأ... دي آخرة التبليط في دفع الأجرة ...

برعي افندي : طب خليك جدع وقوله انك جيت ومالقتنيش ... اعمل معروف ...

عم عوكل : مستأسف ...
( وصفق الباب خلفه ...)
برعي افندي : إخص عليك ... وبعدين .. الراجل ده كل ما اصبره بمبلغ ما بيشبعش ... لكن حقول ايه ...حقه ... وبيطالب بيه ....
( قرر برعي افندي محاولة تهدئة صاحب البيت...)
برعي افندي : أرجوك يا معلم ... أنا ظروفي صعبة ...

المعلم : وانا أخلاقي صعبة ...

برعي افندي : أنا ما أكلتش بقى لي ثلاثة شهور ...

المعلم : وأنا ما قبضتش من ثلاثة شهور !

برعي افندي : يعني مفيش فايدة ؟

المعلم : ولا عايدة ...

برعي افندي : طب اديني فرصة أسبوع واحد ... لحد ما أدبر نفسي ...

المعلم : هم يومين بالعدد ...
( خرج برعي افندي يبحث عن سكن رخيص ... ويالها من مهمة !)
برعي افندي : آه يا نا .. يا رجلي ... هلكت خلاص ..
( جلس برعي افندي على قهوة ... يتطفل على بعضهم )
برعي افندي : ممكن شفطة شاي يا أخ ؟

الراجل : أما شيء بارد صحيح ... اتفضل يا أخي ... خدها ... اشربها كلها ...

برعي افندي : أشكرك ... ممكن كمان الجورنال خمس دقايق ؟

الراجل : آآآآآه ه ه !!!
( وهكذا ترك له الرجل القهوة ... وانصرف ! )
برعي افندي : راجل ذوق والله !
( وقرأ في الجريدة عن إسكان اقتصادي للشباب )
برعي افندي : إيه ده ؟ خبر حلو والله .. معقولة ؟ لازم اعرف الشقق دي بيقدمولها فين ... وليه.. وبكام .. وامتى !
( واللي يسأل ما يتوهش ... وذهب لمكتب الإيجار )
برعي افندي : من فضلك يا أستاذ ... عندي .....

الأستاذ : اشششششش

برعي افندي : لو سمحت ... أنا بسأل عن شقق الشباب ..

الأستاذ : شباب ؟؟ وانت مالك ومال الشباب ؟

برعي افندي : يا سيدي أنا سني صغير بس شكلي هو اللي كدة ..

الأستاذ : مقدم ألفين جنيه .. و ....

برعي افندي : ألفين جنيه؟ ودول نجيبهم منين ؟!

الأستاذ : وانا مالي ؟

برعي افندي : طب وباقي الشروط ايه ؟!

الأستاذ : عقد زواج ...

برعي افندي : عقد زواج ؟ طب وهو العزب اللي زي حالاتي ما يستحقش يسكن ؟

الأستاذ: الشروط كدة يا سيد ما تصدعناش !

برعي افندي : وبعدين ... إيه العمل ؟ يعني مش كفاية الألفين جنيه ؟ جواز كمان ؟
( بينما هو سائر .. خبط في امرأة )
برعي افندي : آآآيييييي ...

المرأة : فتح يا أعمى ..

برعي افندي : أنا آسف .. مخدتش بالي يا مدام ...

المرأة : انت فعلا أعمى ... أنا مزموزيل يا غبي ...

برعي افندي : يااااااااااه ... كل دة ولسة ماتجوزتيش !

المرأة : كل دة إيه يا غبي ؟ حاسب على كلامك ! أنا اتقدملي عرسان بعدد شعر راسي .. لكن الفارس اللي في خيالي ما كانش فيهم ...

برعي افندي : وفارس الأحلام ده .. مواصفاته إيه يا آنسة .... آنسة ....

المرأة : صبرية ... اسمي صبرية !! فارس أحلامي ... شاب .. نحيف ... فقير ... ما فيهوش نفس ...

برعي افندي : ياه ! متهيألي إن الصفات دي كلها متوافرة في العبد لله ... صبرية ... معاكي ألفين جنيه ؟!

المرأة : نعم ؟! باين نقبي طلع على شونة ...

برعي افندي : ما تفهمنيش غلط .. أنا حشرحلك ... أنا محتاج لقسيمة زواج عشان أحجز بيها الشقة ... اللي .... اللي ... حنتجوز فيها يا صبرية ..

صبرية : عقد زواج عشان تجيب شقة تتجوز فيها ؟!

برعي افندي : وكمان ما معاييش مقدم الحجز ... ألفين جنيه...

صبرية : بسيطة ... أنا حسلفك الفلوس ... بس بشرط تكتب الشقة باسمي !

برعي افندي : نعم ؟! أكتبها باسمك ؟ ونبقى عملنا إيه ؟ يفتح الله ...

صبرية : هو ده شرطي ... إذا كان عاجبك ...

برعي افندي : وبعديييييييييين .... أوافقك وأمري لله ؟ حاضر يا صبرية ... أنا موافق ... إيدك بقى ع الفلوس ...

صبرية : الفرح الأول ... انت فاكرني عبيطة ؟

برعي افندي : أنا تحت أمرك ...

صبرية : وتقابل بابا... وتطلبني منه كمان ...

برعي افندي : هو باباكي لسة عايش ؟
( وفي بيت العروس )
برعي افندي : أنا طالب إيد بنتك يا حاج صبري ... قلت إيه ؟

حاج صبري : أعوذ بالله ... بنتي صحيح بايرة ... بس مش لدرجة انها تتجوز شوية عضم !

برعي افندي : قلت إيه يا عمي ؟

حاج صبري : قلت لا إله إلا الله ... البنت رايداك ... ولا حول ولا قوة إلا بالله ...

برعي افندي : عال ... يبقى نقرا الفاتحة ....

حاج صبري : على روحك بإذن الله ... قبل ما نقرا الفاتحة ... ح تدفع لبنتي مهر قدره ربع جنيه ...

برعي افندي : للأسف ... معنديش ربع جنيه !

حاج صبري : يا سيدي ح ادفعهولك من جيبي ... المهم ان المؤخر حيبقة خمسين ألف جنيه ...

برعي افندي : اكتب زي مانت عاوز .. أنا فاقد !
( وتم الزواج سكيتي ولم يقام فرح )
صبرية : تعرف يا سي برعي ؟ أنا مش مصدقة نفسي ....

برعي افندي : تعرقي يا صبرية ... أبوكي راجل محترم لأنه وافق اننا نقيم معه في شقته !

صبرية : مؤقتا وبس ...

برعي افندي : مؤقتا مؤقتا ... الحياة ذاتها مؤقتا !

صبرية : طب اطفي النور عشان ننام ...

برعي افندي : حاضر .. أعوذ بالله ..
( مرت الأيام ... واكتشف برعي افندي أن حياة الفقر التي كان يحياها أهون من هذه الحياة ! )
صبرية : رايح فين ؟

برعي افندي : نازل اشم هوا ... اتخنقت ...

صبرية : طب انا جاية معاك أشم ...

برعي افندي : مش خارج ... ومش شامم هوا ....

صبرية : كويس ... نقعد مع بعض نتكلم ...

برعي افندي : صبرية ... سيبيني في حالي .... أنا مش عاوز اتكلم ...

صبرية : خلاص ... أتكلم انا واسمع انت ....

برعي افندي : أبوس ايدك ... سيبيني في حالي ....

صبرية : ادخل أوضتك يا خويا محدش حيكلمك ....
( بعد دقائق )
صبرية: قوم يا برعي ... أنا حغير ملايات السرير ...

برعي افندي : هي حبكت ؟!

صبرية : ما تقعدش في الصالة كمان عشان حامسحها حالا ... اقعد في المطبخ ...

برعي افندي : طب ما سبتينيش أخرج ليه ما دام بتنضفي الشقة ؟
( ظهرت علامات الحزن عليه في عمله ... )
عبد الغفور : مالك يا برعي افندي ؟

برعي افندي : مفيش يا عبد الغفور افندي ...

عبد الغفور : لأ بجد .... شكلك مش عاجبني ...

برعي افندي : الجواز يا عبد الغفور افندي غلطة عمري اللي ارتكبتها !!!

عبد الغفور : ياه ! هي مضايقاك للدرجة دي ؟

برعي افندي: دي مرض .. كارثة .. مصيبة ...

عبد الغفور : طب ما تطلقها يا سيدي وتريح نفسك....

برعي افندي : كاتب لها مؤخر خمسين ألف جنيه ...

عبد الغفور : يا قوة الله ! خمسون ألف جنيه ؟

برعي افندي : ما تفرقش يا عبد الغفور افندي خمسين الف زي خمسين جنيه ...

عبد الغفور : على رأيك ... ده أي مبلغ ممكن يعجزك ...

برعي افندي : ربنا يفرجها من عنده ...
( في البيت )
صبرية : برعي اعمل حسابك خالاتي جايين يقعدوا معانا كام يوم ...

برعي افندي : وانا بإيدي إيه ؟

صبرية : يعني .. حتنام في المطبخ عشان مفيش أماكن ..

برعي افندي : أمري لله ....
( وتحول البيت إلى حديقة حيوان )
برعي افندي : يا صبرية أنا مش قادر أستحمل أكتر من كدة ... زهقت ... زهقت ...

صبرية : طلقني ...

برعي افندي : والمؤخر أدفعهولك منين بس ؟!

صبرية : خلاص ... استحمل ...
( تطور الأمر بينهما فيما بعد إلى حد الضرب !)
صبرية : قلت مش حتخرج ... طااااااااخ

برعي افندي : آآآآآآآآآآه ... آآآآآآآآآآي !!
( وفي لحظة غضب ...)
برعي افندي : أنا لازم أقتلك لازم .... لاااااااازم !

صبرية : انت تقدر تموت فرخة ؟ فاكر نفسك راجل ؟ ولا حتى بني آدم ؟

برعي افندي : أنا مش راجل ؟ طب انت طالق ...

صبرية : بركة ... إيدك بقى ع الفلوس !

برعي افندي : مش دافع ... وأعلى ما في خيلك اركبيه !

صبرية : ح ادخلك السجن ...
( وفعلا)
برعي افندي وهو في السجن : يا سلااااااااااام ... دة السجن آخر نعيم بالنسبة للي كنت فيه ! دا حتى حل لي مشكلة السكن ... ربنا يديمه علينا نعمة !

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Brave Heart

avatar

عدد الرسائل : 1111
العمر : 30
المزاج : Games & Films
تاريخ التسجيل : 08/05/2008

مُساهمةموضوع: رد: برعي أفندي قرر يتجوز مش تبركوله   الثلاثاء 1 يوليو 2008 - 6:14

هههههههههههههههههههههههه
فعلا بالنسبة لبرعي ولناس كتير السجن أحسن من السكن مع مراته
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
hosam_fedodedo

avatar

عدد الرسائل : 608
العمر : 31
المزاج : aflam agnaby
تاريخ التسجيل : 25/03/2008

مُساهمةموضوع: رد: برعي أفندي قرر يتجوز مش تبركوله   الإثنين 7 يوليو 2008 - 23:44




تكونش اخرتنا زي برعي ؟؟؟؟؟


_________________


fedodedo






الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://killer-hosam.hi5.com
 
برعي أفندي قرر يتجوز مش تبركوله
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الاصدقاء (منتدى طلاب جامعة المنصورة) :: القسم العام :: المنتدى العام-
انتقل الى: